Уште еден убедлив пораз на Македонија

Македонија го доживеа својот четврти пораз на СП во Египет. За жал, и овој пораз е повеќе од убедлив, бидејќи Русија не совлада со огромни 12 голови разлика.

Повторно се провлекоа сите слабости во нашата игра – лошата одбрана, слабата реализација, ниската мотивираност и слабото залагање. Денеска немавме никаква шанса.

Денешниот натпревар повторно го загубивме на самиот старт, бидејќи во првите 15 минути постигнавме само 2 гола, а примивме 8. До крајот на првото полувреме веќе имавме двоцифрена негатива, 9:19.

Второто полувреме само на изглед беше рамноправно, го загубивме со само два гола разлика, бидејќи се почувствува дека Русија го намали темпото, а селекторот Петковиќ целосно ја смени поставата.

Нашиот Мартин Серафимов одигра едно полувреме и успеа да стане втор стрелец во нашиот состав, со 4 постигнати гола.

Овој натпревар ќе остане запаметен и по фактот дека легендарниот Кире Лазаров денеска не постигна гол во својот 42 меч на светските првенства. На претходните 41 натпревар тој секогаш беше стрелец на барем еден гол.

До крајот на главната фаза останува уште средбата со Белорусија, в недела.

.

Македонија – Русија  20:32 (9:19)

Македонија: Митревски (10 одбрани), Томовски (1 седмерец), Стоилов 1, Димитриоски 1, Лазаров, Талески 1, Маркоски, Кузмановски 6, Костески 2, Крстевски 1, Поповски, Младеновиќ, Пешевски 2, Серафимов 4 и Мишевски.     Седмерци: 2/3.     Исклучувања: 12 минути.

Русија: Киреев (7 одбрани), Павленко (3 одбрани), Третинко (2 одбрани), Киселев 1, Котов 1, Осташченко 3, Корнев 4, Василев 4, Кудинов 2, Ермаков, Шишкарев 2, Сорока 6, Валиулин 2, Андреев 1, Житников 3 и Косоротов 3.      Седмерци: 2/3.      Исклучувања: 6 минути.    Црвен картон: Косоротов.

Судии: Шарлот и Џули Бонавентура од Франција.

Селекторот Кире Лазаров го одржа првиот собир на сениорската репрезентација...

Селекторот Лазаров го скрати списокот на ракометари за квалификацискиот двомеч со Данска...

Селекторот Кирил Лазаров го објави поширокиот список на ракометари за квалификациските натпревари...