ЗАГРЕБ БЕЗ ШАНСА ПРОТИВ ДОБРИОТ МЕТАЛУРГ. ФОТО

Во деветтиот меѓусебен натпревар Металург вечерва му го нанесе третиот пораз на тимот на Загреб, прв на теренот на противникот. Натпреварот од 12. коло во Гаспром СЕХА регионалната лига заврши со победа на нашите ракометари, со резултат 30:25 (15:11).

Видовме едно од најдобрите изданија на Металург во тековната сезона и, по подолго време, маестрална партија на Дарко Станиќ, кој собра дури 17 одбрани, меѓу кои и еден седмерец.

Загреб поведе со голот на Степанчиќ, во 2. минута, и тоа беше единствената предност на домашниот состав во текот на целиот натпревар. Вратија Манасков и на двапати Миркуловски, за водство на Металург, 1:3, во 6. минута. Од тој момент, па, се до крајот на средбата нашите ракометари целосно доминираа на паркетот на загребска Арена и одржуваа постојана предност од неколку гола, најголема при резултат 4:9, 6:11 и 10:15. Апсолутни херои на првиот дел беа Станиќ, со 12 одбрани, и Вугринец, кој во овој дел постигна седум од своите осум гола. Во последните десет минути од првиот дел на средбата Вугринец беше нашиот единствен стрелец и нанижа пет гола во серија.

Ништо не се промени ниту во второто полувреме. Улогата на Вугринец ја презеде Павел Атман, кој во вториот дел постигна пет гола. Свој допринос дадоа Наумче Мојсовски (3), Ојлески (3) и Георгиевски (2). Мала криза во нашата игра се почувствува во периодот од 46. до 51. минута, кога противникот дојде на растојание од два гола, но набрзо повторно се одлепивме на сигурни +5, 21:26. На крајот од мечот противникот се обиде да не изненади со пресинг по целиот терен, но искусните ракометари на Металург, се чини, се снајдоа подобро во бркотницата по теренот и забележаа вредна победа, со резултат 30:25.

Загреб – Металург  25:30 (11:15)

Загреб: Ивиќ (6 oдбрани), Стевановиќ (5 oдбрани); Maриќ, Mихиќ 1, Степанчиќ 1, Maтулиќ 2, Шпрем 2, Чориќ 2, Шебетиќ 6, Хорват 5, Шандрк, J. Валчиќ, T. Валчиќ 1, Maндалиниќ 1, Oбрановиќ 3 и Kaлеб 1.     Седмерци: 5/6.    Исклучувања: 6 минути.

Meталург: Станиќ (17 oдбрани), Miјатовиќ, Ojлески 3, Димовски 1, Пецаковски, Вугринец 8, Георгиевски 2, Maнасков 1, Mиркуловски 5, В.Maркоски, З.Mojсоски, Н.Maркоски, Н.Mojсовски 3, Aтман 7, Keџо и Joновски.     Седмерци: 0/1.     Исклучувања: 10 минути.

Овие двајца противници ќе се сретнат и идната сабота, овојпат во Скопје.

Металург веднаш по натпреварот се враќа во Скопје, со летот од 21.15 часот.

Фото: Користени се фотографии на “Sportnet.hr“ и на “24 Sata.hr“

Двенеделна пауза за сите ракометни првенства

Металург го загуби натпреварот во Охрид

Известување до сите фанови на РК Металург